Alde batera gelditzeko eta Jaietako Batzorde Mistoaren lana errespetatzeko eskatu dio Bilduk Azkunari

Published on Asteazkena, 11 Uztaila 2012 14:26

bilbo

0 Comments

Alkatearen eta Bilboko Konpartsak-en arteko ika-mika dela eta, Bilduko Udal taldeak Azkunari alde batera gelditzeko, ez dakienaz ez hitz egiteko eta Jaietako Batzorde Mistoaren lana errespetatzeko eskatu dio.

Batzorde Mistoan Bilduren eleduna den Aitziber Ibaibarriaga zinegotziak aipatu du legegintzaldi honen hasieratik Batzorde Mistoan dauden kide guztiek aitzineko gatazkak alde batera uzteko eta Aste Nagusia hobetzeko lan egiteko disposizioa erakutsi dutela. “Orain arte emandako pausuak positiboak izan dira, Bildurentzat ez nahikoak izan arren, eta baliagarriak izaten ari dira Batzorde Mistoa indartzeko eta batzorde berari protagonismo gehiago emateko”, adierazi du Ibaibarriagak, Bilbo eredu mistoa duen hiriburu bakarra dela azpimarratu ostean.

Bilduko zinegotziak uste du Azkunak azken aldi honetan biderkatu dituen mespretxuzko adierazpenek ez dutela batere laguntzen Batzorde Mistoa egiten ari den esfortzuan. “Ezjakintasunetik Alkateak, behin eta berriro, mesprezatzen ditu batzordean bertan lantzen diren proposamenak. Bronka nahi du eta sua pizten ibiltzen da, eguneroko lanaren eta elkarrizketaren bitartez batzordekideok itzali behar dugun sua”, azpimarratu du Ibaibarriagak.

Bilduren ustez Alkateak ez dakien gai bati buruz, ez du adierazpenik egin behar eta ondorioz jai batzordeari lan egiten utzi egin behar dio. Modu berean jai Batzorde Mistoaren lana errespetatzeko deia egiten dio. Ibaibarriagaren arabera ” Alkatea bere adierazpenekin ez du jai batzordeko kide batzuen lana mespretxatzen soilik, baizik eta jai batzordearen lana bere osotasunean.Guk Batzordeari gero eta eskumen gehiago eman behar zaizkiola uste dugu eta erabakirik ez inposatzea “.